Июндә ниндәй закондар үҙ көсөнә инә?

Июндә Рәсәйҙә Дәүләт Думаһы ҡабул иткән һәм ил президенты Владимир Путин ҡул ҡуйырға әҙерләнгән яңы федераль закондар үҙ көсөнә инә. Улар араһында - вейптар һәм кальяндар өсөн сикләүҙәр, биометрик идентификациянан баш тартыу, Украина гражданлығынан баш тартыуҙы ябайлаштырыу һәм үҙмәшғүлдәргә ярҙам күрһәтеү. Тулыраҡ - «Башинформ» мәғлүмәт агентлығы материалында.

1 июнь - Вейптар һәм кальяндар һатҡанда сикләүҙәр

Никотинлы продукцияны ҡулланыу өсөн ҡулайламалар менән магазиндарҙа һәм павильондарҙа ғына сауҙа итергә мөмкин. Уларҙы йәрминкәләрҙә, күргәҙмәләрҙә, ситтән тороп һатыу тыйыла. Шулай уҡ сауҙа объекттарында кальяндарҙы һәм никотинлы продукцияны ҡулланыу ҡулайламаларын асыҡтан-асыҡ сығарыу, күрһәтеү тыйыла.

1 июнь - биометрик идентификациянан баш тартыу

Күп функциялы үҙәк аша  биометрик шәхси мәғлүмәттәрҙе йыйыуҙан баш тартырға мөмкин. Быны яҙма формала эшләргә кәрәк. Берҙәм биометрик системаны файҙаланып, оборона-сәнәғәт комплексы предприятиелары йәки киҫкен инфраструктура субъекттары кеүек ҡайһы бер ойошмалар биләмәһенә үткәндә физик берәмектәрҙе идентификациялау күҙаллана. Дөйөм ҡағиҙә буйынса биометрик шәхси мәғлүмәттәрҙе берҙәм биометрик системанан тыш эшкәртеү тыйыла.

17 июнь - Украина гражданлығынан баш тартыуҙы ябайлаштырыу

Украина гражданлығынан сығыу өсөн Рәсәйҙең эске эштәр органдарына ғариза биреү ҙә етә. Документ тапшырылған мәлдән алып гражданлыҡтан баш тартыу ғәмәлдә тип иҫәпләнә.

29 июнь - үҙмәшғүлдәргә ярҙам итеү

Барлыҡ физик шәхестәргә тауар билдәләрен теркәргә рөхсәт ителә. Атап әйткәндә, хәҙер был хоҡуҡ менән үҙмәшғүлдәр һәм гражданлыҡ-хоҡуҡи договорҙар буйынса хеҙмәттәр күрһәтеүсе кешеләр файҙалана ала. Элек тауар билдәләренә юридик берәмектәр һәм шәхси эшҡыуарҙар ғына эйә ине.

Хәтерегеҙгә төшөрәбеҙ, 29 майҙа төбәк бюджеттарына НДФЛ индереүҙең беренсе сираттағы тәртибе  һәм ер һатҡанда балалы ғаиләләрҙе НДФЛ түләүҙән азат итеү (ике һәм унан күберәк бала тәрбиәләгән ғаиләләр өсөн көнүҙәк - улар һатылған йорт һәм хужалыҡ ҡаралтылары урынлашҡан ер участкаһын һатҡанда һалым түләмәйәсәк) тураһында закондар үҙ көсөнә инде.

Фото: https://ru.freepik.com