Гүзәл Ситдиҡова тыуған көнөн билдәләй

БАШҠОРТ ҠАТЫНЫ

Уралымдың сикһеҙ хазинаһы,
Балҡып ята алмас, алтыны,
Тик алмастан, алтынынан ҡиммәт
Аҫылташ ул – башҡорт ҡатыны.

Тарихыбыҙ ҡанға батҡан мәлдә
Ғазаптарҙы күпме татыны –
Дошмандарға йәшен күрһәтмәне,
Бирешмәне башҡорт ҡатыны

Хәйләләргә артыҡ оҫталыҡ юҡ,
Телебеҙ ҙә ҡай саҡ ҡатылыр,
Тик изгелек – ҡандан килгән сифат,
Тоғролоҡло башҡорт ҡатыны

Һынағанда яҙмыш рух ныҡлығын,
Йән һаҡлаған кемдер һатылып,
Утта янған, ләкин суҡынмаған
Иман һаҡлап башҡорт ҡатыны.

Улҡайҙары яуға киткән саҡта
Уртҡайҙары ҡара ҡан тулы,
Еңеп ҡайт, тип, илде һаҡла, тиеп
Фатихалай башҡорт ҡатыны

Юғалмауы ҡиммәт быуаттарҙа
Башҡорт тигән исем-атының,
Бының өсөн мең-мең һиңә рәхмәт,
Бөйөк әсә – башҡорт ҡатыны!

Ҡурҡмайым

Айыуҙан һис ҡурҡмайым ул,
Янында торам ғына,
Балаларға теймә, тиеп
Ҡолағын борам ғына.
Өҫтөнә менеп атландым,
Ултыра һис ҡымшанмай,
Йоҙроҡ менән төрткәндә лә
Бер яҡҡа ла тайшанмай.
Бөгөн мин шундай батырмын,
Бөгөн мин шундай ҡыйыу,
Түҙә инде, ҡайҙа барһын
Ағастан юнған айыу!

Гүзәл СИТДИҠОВА.