Киләсәк быуынды тәрбиәләп

Хәҙерге йәмғиәттә ирҙәрҙең, атайҙарҙың баланы тәрбиәләүҙәге роле, уларҙың бурыстары һәм хоҡуҡтары тураһында йышыраҡ һөйләй башланылар. Үкенескә күрә, һуңғы тиҫтә йылдарҙа йәмғиәттә атайҙың һәм ир-егеттең статусы, абруйы юғала, ҡатын-ҡыҙҙарҙың күбеһе ир-егеттәрҙең хәстәрлеген үҙ иңенә ала, ләкин иң хәүефлеһе - балалар тулы булмаған ғаиләләрҙә тәрбиәләнә. Ошо көндәрҙә Федоровка ауылында үткән "Яуаплы атайлыҡ" төбәк-ара стратегик сессияһы барышында йәмғиәттә ир-егеттәрҙең роленә ҡағылышлы ошо һәм башҡа мәсьәләләр хаҡында һүҙ барҙы. Тап Федоровка ауылында осрашыу үткәреү осраҡлы түгел - улар районда беренселәрҙән булып был проблемаға иғтибар итте, ауылда “Айыҡ ауыл” конкурсының республика этабы сиктәрендә “Таяныс” атайҙар клубы ойошторолдо.

Атайҙар клубында ҡатнашыусылар аҙна һайын ауылдың атайҙар һәм уларҙың улдары йыйылып файҙалы эш менән шөғөлләнә, өлкәндәре кескәйҙәрҙе оҫталыҡҡа, үҙ ҡулдары менән файҙалы эш эшләргә өйрәтә. Бына шундай файҙалы шөғөлдәр артында ир-егеттәрҙең малайҙарға ирҙәр тәрбиәһе бирә лә инде. Күптәрҙең тулы булмаған ғаиләлә тәрбиәләнеүен иҫәпкә алғанда, был осрашыуҙарҙың әһәмиәте баһалап бөткөһөҙ. Хәйбулла, Баймаҡ, Ейәнсура, Йылайыр, Бөрйән райондарынан, Сибай ҡалаһынан һәм Ырымбур өлкәһенән атайҙар, командаларға берләшеп, хәҙерге йәмғиәттә атайҙың ролен үҫтереү мәсьәләләрен өйрәнде, хәл итеү юлдарын эҙләне, стратегияны әҙерләне. (ред.)