Байрам балаларҙың күңеленә лә хуш килә

"Китап-Байрам"ына күптәр йәш балалары, ейән-ейәнсәрҙәре менән киләләр. Һәм был дөрөҫ тә! Бында йәш быуынды үҙенә магниттай тартып тороусы төрлө саралар уҙғарыла. Балалар өсөн нәшер ителгән гәзит-журналдар күңелле уйындар ойошторһа, төрлө оҫталыҡ дәрестәренә һөнәрҙәргә лә өйрәнәләр. Салауат ҡалаһынан "Үҙ химия" тип аталған яңы быуын моделле китапханаһынан килгән Ҡорманова Гөлназ менән Кинйәбулатова Миләүшә балаларға 3Д ручка менән төрлө һындар эшләргә өйрәтә. Ф. Мостафина исемендәге 20-се башҡорт гимназияһы уҡыусыһы Алтынай Урманшина икенсе көн рәттән бында килеп, үҙенә теләгән һындар эшләне.