Радий Хәбиров: "Табиптар уның өсөн туғыҙ көн көрәште"

"Табиптар уның өсөн туғыҙ көн көрәште, йәрәхәттәре ауыр ине. Мин табиптарҙың нисек эшләүен үҙем күрҙем. Ҡыуатов исемендәге Республика клиник дауаханаһының баш реаниматологы өс тәүлек йоҡламаны..."

Бөгөн Хөкүмәттең оператив кәңәшмәһе барышында Башҡортостан Башлығы Радий Хәбиров бер туған ағаһының ғүмере өсөн көрәшкән Ҡыуатов исемендәге Республика клиник дауаханаһы табиптары командаһына рәхмәт әйтте.

"Миңә һәм ғаиләмә күрһәткән иғтибарығыҙ өсөн барығыҙға ла рәхмәт белдерәм. Бындай ваҡытта ҡайғы уртаҡлашыу бик мөһим. Табиптар уның өсөн туғыҙ көн көрәште, йәрәхәттәре ауыр ине. Мин табиптарҙың нисек эшләүен үҙем күрҙем. Ҡыуатов исемендәге Республика клиник дауаханаһының баш реаниматологы өс тәүлек йоҡламаны. Минең ағайым булғанға түгел, кешеләр ысынлап та шулай йәшәй", – тип аңлатма бирҙе Радий Хәбиров.

Башҡортостан Башлығының бер туған ағаһы Ришат Хәбиров юл фажиғәһендә алған йәрәхәттәрҙән һәләк булып ҡалыуы тураһында хәбәр иткәйнек. Радий Хәбиров ағаһының бәлиғ булмаған улы ҡалыуы, уның атаһына “ныҡ бәйле" булыуын әйтте. "Үҙегеҙҙе һаҡлағыҙ. Туғандарығыҙҙың һәм яҡындарығыҙҙың һуңынан илауына юл ҡуймағыҙ", – тине Башҡортостан Башлығы.

Автор:Гөлдәр Яҡшығолова