Валерий Назаров та башҡорт теленән диктант яҙырға килде

Башҡортостан Яҙыусылар союзы йортонда ла бөгөн башҡортса диктант яҙҙылар. Араларында төрлө быуын, төрлө милләт кешеләре булыуы ҡыуандырҙы. Мәҫәлән, Валерий  Назаров - рус егете. Өфөлә үҫкән. Шәхси эшҡыуарлыҡ менән шөғөлләнә. Валерий бәләкәйҙән йыр-моңға, әҙәбиәткә, төрлө телдәргә ғашиҡ. Йырлай, башҡортса өйрәнә, хатта махсус башҡорт милли кейеме лә бар. 

-Шәхестең күп тел белгән  һайын мәҙәни кимәле байый, күпте белә.  Балаларым да башҡорт телен ихлас өйрәнә, - ти Валерий. 

Сараны Яҙыусылар союзы рәйесе урынбаҫары Тәнзилә Дәүләтбирҙина шиғырлы сәләм менән асты. Артабан ҡурайсы Айҙар Байтимеров "Урал" башҡорт халыҡ көйөн уйнаны.

Диктантты Йәш яҙыусылар ҡоро ағзаһы, шағирә Таңсулпан Рәсүл уҡыны.