Мәҙәктәр

«Үҙегеҙ ҡушып алығыҙ»

– Кемдән алабыҙ?
– Һорап тораһың тағы, Фатиха апайҙан инде. Үәт, уныҡы көмөшкә тәк көмөшкә!
Ауылыбыҙҙа тиҫтәләгән кеше көмөшкә менән кәсеп итһә лә, халыҡ айырыуса бирге оста йәшәүсе Фатиха апайҙыҡын юғары баһалай. «Был тиклем дә оҫта кеше булыр икән!» – тип үҙен дә, көмөшкәһен дә маҡтай-маҡтай эсәләр.
Ул көндө баштары ҡутарылып килгән Самат менән Морат Фатиха апайҙың йортона килә. Әммә йүнсел ҡатын ҡайҙалыр йомош менән киткән икән.
– Мужыт үҙең генә биреп ебәрерһең, – тип мөлдөрәп ҡарай улар ун-ун ике йәштәрҙәге ҡыҙыҡайға. – Һин бит хәҙер ҙур үҫкәнһең, әсәйеңдең самогоны ҡайҙа икәнлеген беләһеңдер, – тип күңелен дә күтәреп ебәрмәксе булалар.
– Беләм, беләм! – ҡыҙыҡай йүгереп барып, шкафтан бер яртыны ала.
– Бына ул! Ағайҙар, ә бына быныһын күпме һалыр­ға белмәйем, үҙегеҙ самалап ҡушырһығыҙ әле, – тип ҡағыҙ менән бәләкәс кенә төргәк һона.
Егеттәр, ҡалай башлы ҡыҙыҡай, закускаһын да һала белеүен әйт әле, тип ҡыуана-ҡыуана, йылға буйына саба. Закуска тигән нәмәкәйҙең тауыҡ тиҙәге икәнлеген улар шунда ғына белә.

И. КӨМӨШБАЕВ.

********

Циркта иҫ киткес номер: крокодил пианинола уйнай, ә бегемот романс йырлай. Зал шығырым тулы, баш әйләнерлек уңыш. Директор түҙмәй, был номерҙың авторына мөрәжәғәт итә:
– Дөрөҫөн әйтегеҙсе, бының бит булыуы мөмкин түгел: нисек инде крокодил пианинола уйнай, ә бегемот йырлай? – ти.
– Эйе, һеҙ дөрөҫ әйтәһегеҙ, – тигән номер авторы. – Әлбиттә, бының булыуы мөмкин түгел. Ысынында иһә бегемот ауыҙын ғына аса, ә крокодил уйнай ҙа, йырлай ҙа.

*********

Ике буйҙаҡ һөйләшә:
– Яңыраҡ ҡына, Миләүшәгә өйләнәм, тип хәбәр һөйләп йөрөй инең, әле кире уйлағанһың. Берәй әтнәкәһе бармы әллә?
– Әйтһәм әйтәйем инде, ул бик йәмһеҙ итеп көлә икән.
– Әлләсе, мин бер ҙә һиҙмәнем...
– Уға элекке көн күпме эш хаҡы алғанымды әйткәйнем, көлөп, быуылып үлә яҙҙы.