+22 °С
Ямғыр
Әҙәбиәт һәм ижад
12 Декабрь 2021, 05:23
Бөгөн Башҡортостандың халыҡ шағиры Рауил Бикбаевтың тыуған көнө.
Таш һыныңды, Урал, оҡшатамынҠандан ҡанға кергән ҡылысҡа.Ҡулдарына һине алмаҡ булып,Күпме дошман ерҙә тырышҡан.Ил баҫырға килгән һәр килмешәкБыл ҡылыстан ауған туралып.Күпме генә һиңә ҡараһам да,Күҙем тала белмәй, Уралым.Шишмәләрең минең йөрәк ашаСылтыр-сылтыр ағып үтәләр.Йөрәгемә, гүйә, ҡаным түгел,Шул шишмәләр йәшәү илтәләр…Һиңә баҡһам, күңелем күтәренке,Киләсәгем шат та, тыныс та,Сөнки беләм:Иңдәрендә илдеңУрал тигән һынмаҫ ҡылыс бар.Рауил Бикбаев
Бөгөн Башҡортостандың халыҡ шағиры Рауил Бикбаевтың тыуған көнө.
Рауил Бикбаев университетта уҡыған йылдарында яҙыша башлай. «Дала офоҡтары» тигән тәүге шиғырҙар йыйынтығы 1964 йылда донъя күрә. Шунан бирле ул ике тиҫтәгә яҡын китап сығарҙы, хәҙерге башҡорт поэзияһының кимәлен билдәләрлек күренекле шағир булып танылды. Рауил Бикбаев поэзияһында халыҡ яҙмышына бәйле проблемалар күтәрелә, заман, ил, халыҡ, киләсәк алдында яуаплылыҡ тураһында һүҙ бара. «Карауанһарай», «Баҙар балтаһы», «Һыуһаным, һыуҙар бирегеҙ!» поэмаларында, «Халҡыма хат» шиғырында был бигерәк тә асыҡ күренә.
Рауил Бикбаев — күренекле әҙәбиәт ғалимы. Ул филология фәндәре докторы, профессор. Хәҙерге башҡорт шиғриәтенең үҫеш проблемаларына арналған күп ғилми хеҙмәттәр авторы. Уның бигерәк тә Ш. Бабич ижадын өйрәнеү, әҫәрҙәрен халыҡҡа ҡайтарыу өсөн башҡарған эштәре ҙур.
Рауил Бикбаев Башҡортостан Республикаһының Ғ. Сәләм исемендәге йәштәр премияһы, Салауат Юлаев исемендәге дәүләт премияһы лауреаты. 1992 йылда уға «Башҡортостандың халыҡ шағиры» тигән маҡтаулы исем бирелде.
Әҙип оҙайлы ауырыуҙан һуң 2019 йылдың 23 апрелендә Өфөлә вафат булды[1] һәм 25 апрелдә ҡаланың Мосолмандар зыяратына ерләнде[2].
