Бөгөн - Рәсәй киноһы көнө

27 август – Рәсәй киноһы көнө. 1919 йылдың 27 авгусында В.И.Ленин кинематографты национализациялау тураһындағы декретҡа ҡул ҡуя, шуға күрә СССР-ҙа, ә аҙаҡтан Рәсәйҙә лә был көн киноиндустрияға бәйле кешеләр өсөн байрамға әүерелә. Тәүге киносеанс Парижда 1895 йылда үтә. Рәсәйҙә ҡуйылған тәүге фильм 1908 йылдың 15 октябрендә күрһәтелә. Владимир Ромашков, «Из-за острова на стрежень» тигән халыҡ йырына нигеҙләнеп, Степан Разин тураһында «Понизовая вольница» тигән ете минутлыҡ фильм төшөрә. Ә «Броненосец Потемкин» тигән төҫлө фильм 1925 йылда экранға сыға. Уны Сергей Эйзенштейн төшөргән була.

Васильевтарҙың «Чапаев» фильмы 1935 йылда I Халыҡ-ара Мәскәү кинофестивалендә беренсе премияға лайыҡ була.

Кино тиҙ үҫешә торған сәнғәт төрө. Ошо осор эсендә кино телһеҙҙән – тауышлыға, ҡаралы-аҡтан төҫлөгә әйләнде. Һәм ул идеялогияны алға һөрөүсе генә түгел, ә индустрия йәһәтенән дә бик табышлы өлкә икәнен күрһәтте. Уңышлы фильм тиҙ арала төшөргән сығымды ғына ҡаплап ҡалмай, ә билет һатыуҙан да (телевидение, видеопрокатты иҫәпкә алмағанда ла) бик күп аҡса йыйып ала.

Фильмдар жанрҙар төрлөлөгө менән дә йәлеп итә: фәнни, документаль, публицистик, нәфис, фильмдарҙы һайлап ҡарарға мөмкин. Кинофестивалдәр шулай уҡ тамашасы иғтибарынан ситтә түгел: «Оскар», Халыҡ-ара Мәскәү кинофестивале, Каннылағы «Алтын пальма ботағы» һәм башҡа фестивалдәр мәғлүмәт сараларында киң яҡтыртыла килә.