Ҡышҡы көн Дамир Шәрәфетдинов

Саф һауала эленгән дә
Шаян ҡар бөртөктәре,
Аҫҡа түгел – үргә яуа.
Уй, теремеклектәре!..
Ап-аяҙ һәм йып-йылы көн,
Саҡ-саҡ монарҙа ҡояш.
Ҡышҡы селлә миҙгелендә
Шундай, вәт, һауа торош!
Күккә ашҡан еңеллектән
Осоп китерҙәй күңел.
Ана, елдә, ҡарҙарҙа ла
Минең күңелдәй фиғел.
Ем-ем күҙҙе сағылтырлыҡ
Аҡ юрған тирә-яғым.
Ҡышҡы йоҡоһонда, тиҙәр
Тәбиғәттең был сағын.

Фото: sunhome.ru