Йәй Айзилә МОРТАЕВА

Йәйҙәрҙең уртаһы -
Нәҡ аштың һурпаһы:
Ул ҡайнар, ул беше,
Ул татлы, ул эҫе!
Йәйҙәрҙең уртаһы -
Баҫыуҙа көнбағыш.
Йәй гел дә көләкәс,
Йәйҙәрҙә юҡ һағыш.
Йәйҙәрҙең уртаһы -
Силәктә еләктәр.
Йәйҙәрҙә бар ғаләм -
Иң һутлы еләктәй!
Йәйҙәрҙең уртаһы -
Болонда күбәләк.
Йәйҙәрҙә гел йәм дә,
Донъялар - түңәрәк!
Йәйҙәрҙең уртаһы -
Моңло йыр ҡумтаһы.
Салғылар сыңына,
Сиңерткә йырына,
Күңелем, сум тағы!
Йәйҙәрҙең уртаһы-
Йәйҙәрҙә йәнләнәм.
Йәйҙәрҙә кинәнә
Бар тирә - әйләнәм!