Һағыҙаҡ Рамай ҠАҺИР

Бесән өҫтө. Сәй эсәбеҙ.
Ҡулымда - баллы ҡалаҡ.
Еңел генә бал тәмләргә
Ныҡыша бер һағыҙаҡ.
Шулай йәшәп өйрәнгән ул,
Хәрәмдә - бар донъяһы.
Тормош бит ул, осрап тора
Һағыҙаҡтар ояһы!
Геүләй ижад умартаһы,
Илһам сәскә атҡан саҡ.
Арабыҙҙа бар һағыҙаҡ,
Булайыҡсы, зинһар, һаҡ!
Баллы ҡалаҡҡа һырышҡан,
Тапҡан шәп, ҡулай урын.
Ауыҙ - телеңде сағасаҡ, -
Күрмәй ҡалһаң - бал бурын!
Уның холоҡ - ҡыланышын
Ҡарап ултырам оҙаҡ.
...Сос йәшәргә өйрәтәһең, -
Рәхмәт һиңә, һағыҙаҡ!