ҠӘЙНӘЛӘР Фәүзиә ҠОТЛОГИЛДИНА

Ҡәйнәләр ҙә ҡатын-ҡыҙ затынан
Уға ауыр һүҙҙәр әйтмәгеҙ,
Күңелдәре һәр саҡ бөтөн булһын,
Ҡәйнә күңелдәрен китмәгеҙ.
Улар һеҙгә ғүмер кисерергә
Улдар, ҡыҙҙар бағып үҫтергән,
Бәпләп һөйгән ғәзиз балаһына
Әйбәт кейәү, килен теләгән.
Балаҡайы белем алған саҡта
Икенсе ҡат мәктәп уҡыған,
Ауырыһа уның яндарында
Йоҡламайса төнөн ултырған.
Ҡәйнәләрҙе үҙ әсәгеҙ кеүек
Яҡын кеше итеп күрегеҙ,
Иҫән саҡта ҡәҙерҙәрен белеп
Яндарына ҡайтып йөрөгөҙ.
Ҡәйнә - хәләл йәреңдең әсәһе,
Әсәйҙәрҙе һәр кем ярата,
Ҡәйнәләр ҙә ғаилә күгендә
Яҡты, йылы нурын тарата.
Һеҙҙең балаларға Оло әсәй
Тормош тотҡалары ҡәйнәләр,
Бик бәхетле йәшәй был донъяла
Ҡәйнәләре булған ғаиләләр.
Фәүзиә Ҡотлогилдина - АЛТЫНБИКӘ

Фото: Бәйләнештә.